ਸੜਕ ਬਣਾਉਣ ਲਈ ਪ੍ਰਸਿੱਧ ਗੁਰਦੁਆਰਾ ਢਾਹੁਣ ਲਈ ਹਾਈ ਕੋਰਟ ਵੱਲੋਂ ਹਰੀ ਝੰਡੀ

ਗੁਰਦੁਆਰਾ ਸਾਂਝਾ ਸਾਹਿਬ

ਚੰਡੀਗੜ੍ਹ: ਸੜਕ ਬਣਾਉਣ ਲਈ ਚੰਡੀਗੜ੍ਹ ਸਥਿੱਤ ਪ੍ਰਸਿੱਧ ਗੁਰਦੁਆਰਾ ਸਾਂਝਾ ਸਾਹਿਬ ਢਾਹ ਦਿੱਤਾ ਜਾਵੇਗਾ। ਹਾਈਕੋਰਟ ਨੇ ਇਸ ਖਿਲਾਫ਼ ਅਪੀਲ ਖ਼ਾਰਜ ਕਰ ਕੇ ਇਸ ਨੂੰ ਢਾਹੁਣ ਦਾ ਰਾਹ ਪੱਧਰਾ ਕਰ ਦਿੱਤਾ ਹੈ।  ਪੰਜਾਬ ਅਤੇ ਹਰਿਆਣਾ ਹਾਈਕੋਰਟ ਨੇ ਸੈਕਟਰ-63 ਦੇ 'ਗੁਰਦੁਆਰਾ ਸਾਂਝਾ ਸਾਹਿਬ' ਨੂੰ ਐਕੁਆਇਰ ਤੋਂ ਮੁਕਤ ਕਰਨ ਤੋਂ ਇਨਕਾਰ ਕਰ ਦਿੱਤਾ ਹੈ। ਇਹ ਜ਼ਮੀਨ 1991 ਵਿੱਚ ਵੀ-3 ਸੜਕ ਬਣਾਉਣ ਲਈ ਐਕੁਆਇਰ ਕੀਤੀ ਗਈ ਸੀ, ਜੋ ਸੈਕਟਰ-63 ਨੂੰ ਮੋਹਾਲੀ ਫੇਜ਼-7 ਦੇ ਵਾਈ.ਪੀ.ਐੱਸ. ਚੌਂਕ ਨਾਲ ਜੋੜੇਗੀ।

ਚੀਫ ਜਸਟਿਸ ਸ਼ੀਲ ਨਾਗੂ ਅਤੇ ਜਸਟਿਸ ਅਨਿਲ ਖੇਤਰਪਾਲ ਨੇ ਫੈਸਲਾ ਦਿੱਤਾ ਕਿ ਐਕੁਆਇਰ ਵਿੱਚ ਕੋਈ ਪੱਖਪਾਤ ਨਹੀਂ ਸੀ। ਗੁਰਦੁਆਰਾ 1986 ਵਿੱਚ ਬਣਾਇਆ ਗਿਆ ਸੀ। 1999 ਵਿੱਚ ਦਾਇਰ ਕੀਤੀ ਪਟੀਸ਼ਨ ਵਿੱਚ ਕੋਈ ਦਮ ਨਹੀਂ ਪਾਇਆ ਗਿਆ ਕਿਉਂਕਿ ਜ਼ਮੀਨ 1991 ਵਿੱਚ ਹੀ ਕੇਂਦਰ ਸ਼ਾਸਿਤ ਪ੍ਰਦੇਸ਼ ਦੇ ਅਧੀਨ ਆ ਗਈ ਸੀ। ਪਟੀਸ਼ਨਕਰਤਾ ਨੇ 1894 ਐਕਟ ਦੀ ਧਾਰਾ-5 ਏ ਦੇ ਤਹਿਤ 30 ਦਿਨਾਂ ਦੇ ਅੰਦਰ ਕੋਈ ਇਤਰਾਜ਼ ਵੀ ਦਰਜ ਨਹੀਂ ਕਰਵਾਇਆ ਸੀ।